Мектеп тарихы
Мәктәпниң йеқинқи тарихи төвәндикичә:
Һазирқи мәктәп 1989 жили «Йолчи» колхозиниң сабиқ рәиси, һели мәрһум Тохтасун ака Мариповниң беваситә уюштуриши билән биринчи сентябрьға үлгәртип пайдилинишқа берилди.
Дәсләп мәктәп мудири болуп Мусяров Юпитер сайлинип йеңи мәктәптә йеңи оқуш жилини башлиған болса, 1991 жили Бушаров Мәһәммәт мәктәп мудирлиғи лавазимини атқурди. М. Бушаров һөрмәтлик дәмелишқа кетишигә мунасивәтлик мәктәп мудири болуп Минәмжан Сайпутуллаев бәкитилди. Минәмжан Сайпутуллаевниң саламәтлиги бола өз өтиниши асасида мудирлиқтин бошиғандин кейин, шу вақитқичә директорниң оқуш ишлири бойичә орунбасари хизмитини атқурған Алаева Кларәм мәктәп директори болуп сайланди. Ю. Мусяров М. Бушаров, М. Сайпутуллаев, К. Алаевалар мудирлиқ вәзипини атқурған жиллири мәмликәттә зор өзгиришләр болуватқан пәйтләр еди. Шуниңға қаримай, исми аталған мәктивимизниң мудирлири оқуғучиларға сапалиқ билим, аңлиқ тәрбийә берип мәктәпниң материаллиқ базисини кәңәйтишкә көп күч чиқарди. Математика пәни бойичә муәллим йетишмәслиги сәвәвидин өз ихтияри билән мәктәп мудири хизмитидин бошитилип, униң орниға 2001-жили жутдишимиз Талипжан Садыков мәктәп мудири болуп сайланди. Талипжан Садыковниңму ана жуттики мәктәпкә сиңәргән әмгиги бебаһа. Талипжан Садыковниң башқа мәктәптә мудирлиқ хизмитигә авушишиға бағлиқ униң орниға мәктивимизниң оқуғучиси Малыбаева Халима Масимахунқизи 2006 жилдин башлап мудирлиқ хизмитини атқуруп кәлмәктә. 2007-жили башлап мәктәпкә һамийлиқ қилғучи жутдашлар ичидә Нурмәһәммәт Палтахуновниң исмини мәктәп коллективи, жут-жамаәт мәмнунийәт билән әсләйду.
Атап ейтқанлиқ қуруқ махтиғанлиқ вә артуқ ейтқанлиқ болмас бу жут пәрзәнти дәсләпки сахавәтлик ишини мәктәпни мурәккәп ремонт ишини өткүзүштин башлиди; мәктәпниң ишик-деризилири, едәнлири, безәлләндүрүш ишлири толуғи билән заманивий үлгигә авуштурулди. Жүриги жутум дәп соққан бу мәрт-мәрданә Инсанниң мәктәп әлачилири үчүн бәлгүлигән стипендияси, жутқа салған мәсчид, тәминати төвән аилиләргә бәргән ярдими униң хәйрихаһлиқ ишлириниң бир көрүнүшидур, халас. Мәктәп әлачилири, көп балилиқ вә тәминати төвән аилиләрниң балилириниң язлиқ тәтилдики дәмелишини өзиниң инсаний вәзиписи дәп чүшәнгән Арзигүл һәдә Инипаеваму сахавәтлик жутдашлиримизниң бири.
Қазақстандики уйғур жамаәтчилигигә «Тереза Ана» атилип, Республикилиқ уйғур этномәдәний мәркизи йенидики «НҰР-АНА» анилар кеңишиниң рәиси, жәмийәт әрбаби, Қазақстан Ассамблеясиниң «Бирлик» Алтун медалиниң , «Бейбітшілік әлемі» ХҚТБ ниң «Ұлт мақтанышы» медальлириниң , «Алтун жүрәк» ордениниң саһиби, Жахангер Әһәтқизи Муратованиң мәктивимиз үчүн, жутимиз үчүн сиңәргән әмгиги бебаһа. Республика көләмидә уюштурилидиған «Мәктәпкә йол» акциясигә актив қатнишип мәктивимиздики көп балилиқ вә тәминати төвән аилиләргә үзлүксиз ярдәм қолини сунуп кәлмәктә.